Kuvve-i umumiye neden terekküp eder?
Kuvve-i umumiye; birincisi vatan ve milleti düşmana karşı müdafaa ile mükellef (asker), ikincisi intizam ve hükm-i kanunu muhafazaya memur (jandarma) ile (polis)ten terekküp eder.
Kaç nevi asker vardır?
İki nevi asker vardır: Biri kara askeri diğeri deniz askeridir. Kara askerlerine (Asâkir-i Berriye), deniz askerlerine (Asâkir-i Bahriye) denir.
Asâkir-i Berriye nasıl teşkil olunmuştur?
İdare-i askeriye mukaddema yedi orduya tefrik edilmiş idi. Lakin ahîren Harbiye Nezaretinden tertip edilip meriyyetine irade-i seniyye sadır olan ordu teşkilat-ı cedidesi mucibince idare-i askeriye on dört ordu ve beş fırka-i müstakilleye taksim olunmuştu ki merkez ve mevkileri şunlardır:
Ordu merkezleri: İstanbul, Edirne, Selanik, Kırk kilise, Tekfurdağı, Manastır, Üsküp, Erzurum, Şam, Van, Erzincan, Musul, Bağdat, San‘a,
Beş fırka-i müstakille merkezleri: Kozan, Yanya, İşkodra, Trablusgarp, Mekke-i Mükerreme.
Müddet-i askeriye kaç senedir?
Müddet-i askeriye yirmi senedir. Her Osmanlı yirmi yaşından kırk yaşına kadar asker olmaya mecburdur. Lakin kanun-ı askeri sakat veya alîl olanlarla sair bazı kimseleri vazife-i askeriyeden istisna etmiştir.
Kura nedir?
Her Osmanlı yirmi yaşına geldiği vakit askere alınır. Üç sene askerlik hizmetini ifa eder. Ondan sonra ifa-yı hizmet ettiğine dair tezkiresini alıp memleketine avdet eder.
